पोखरा युवा परिषदबाट ६ जनालाई वर्ष उत्कृष्ठ युवा पुरस्कार

पोखरा महानगरपालिकाको नगर युवा परिषदले ६ क्षेत्रमा क्रियाशील ६ जना युवालाई वर्ष उत्कृष्ठ पुरस्कार प्रदान गरेको छ । युवा उद्यमी तथा प्रतिभा पुरस्कार छनोट समितिको सिफारिसका आधारमा परिषदले शनिबार एक समारोहबीच ६ युवालाई पुरस्कृत गरिएको हो ।
६ क्षेत्रमा क्रियाशील ४० वर्ष मुनिका युवाहरुमध्येबाट छनोट गरेर पुरस्कृत गर्ने र युवाहरुमा आशा तथा उर्जा भर्ने कामको थालनी गरिएको परिषदका उपाध्यक्ष सन्तोष न्यौपानेले जानकारी दिए । यसरी पुरस्कृत हुनेमा अमृत सुवेदी, स्वदेश नेपाली, मोतिबहादुर कार्की (परिवर्तन), सन्तोष पौडेल, रोशनी आचार्य र प्रदीप खड्का छन् ।
पत्रकारिता क्षेत्रबाट अनलाइनखबर डट कमका गण्डकी ब्युरो प्रमुख सुवेदी, सामाजिक तथा सरसफाइ क्षेत्रबाट पौडेल, विज्ञान तथा प्रविधि क्षेत्रबाट ब्लाक टेकका प्रमुख कार्यकारी निर्देशक स्वदेश नेपाली, कला, साहित्य तथा नाट्य क्षेत्रबाट पोखरा थियटरका सञ्चालक परिवर्तन, कृषिबाट ‘हरिलो’ उत्पादन तथा विक्री गरिरहेकी रोशनी आचार्य, खेलकुद क्षेत्रबाट लङ टेनिशका खेलाडी प्रदीप खड्का पुरस्कृत भएका हुन् ।
झण्डै दुई दशकदेखि पत्रकारिता क्षेत्रमा क्रियाशील सुवेदीले समासामयिक तथा राजनीतिक क्षेत्रमा कलम चलाउँछन् । पर्यटन प्रवद्र्धन, वातावरण संरक्षण तथा दीगो विकास क्षेत्रमा क्रियाशील पौडेल फोहोरमैला व्यवस्थापनको क्षेत्रमा विज्ञता हासिल गरेर काम गरिरहेका छन् । विज्ञान तथा प्रविधि, शिक्षा क्षेत्रबाट पुरस्कृत नेपालीले रेस्ट्रो एक्स एपमार्फत देश तथा विदेशमा १० हजार होटल, रेस्टुरेन्टलाई डिजिटल सेवा दिइरहेको छ । उनले ४६ जनालाई रोजगारी दिइरहेका छन् ।
कला, साहित्य, संस्कृति तथा नाट्य क्षेत्रबाट पुरस्कृत परिवर्तनको नेतृत्वमा नाटक घर निर्माण गरेर नाटक निर्माण, मञ्चन तथा प्रवद्र्धनमा लागि परेका छन् । हरिलो नाममा अर्गानिक अचार देश तथा विदेशमा पु¥याइरहेकी रोशनीले मासुजन्य अचारसहित विभिन्न कृषि उत्पादनको बजारीकरण गरिरहेकी छन् । हरिलोमा अहिले २५ जनाले रोजगारी पाएका छन् ।
लङ टेनिश खेलाडी प्रदीप नेपालकै उत्कृष्ठ खेलाडी हुन् । उनले राष्ट्रिय तथा अन्तर्राष्ट्रिय थुप्रै पुरस्कार प्राप्त गरेका छन् ।
गण्डकी विश्वविद्यालयका डिन डा कपिल अधिकारीको संयोजकत्वमा गण्डकी प्रेस रजिस्टार विमला भण्डारी, पोखरेली युवा सांस्कृतिक परिवारका निवर्तमान अध्यक्ष उपेन्द्र पौडेल, कानुन व्यवसायी कुञ्जनी प्यासीपरियार, पोखरा खेलकुद समितिका उपाध्यक्ष दीपक गोदार, पोखरा पर्यटन परिषदका अध्यक्ष तारानाथ पहारी, पोखरा महानगरका आर्थिक विकास महाशाखा प्रमुख मनहर कडरिया सदस्य रहेको प्रतिभा छनोट समितिको सिफारिसका आधारमा ६ जनालाई पुरस्कृत गरिएको पोखरा नगर युवा परिषदका उपाध्यक्ष सन्तोष न्यौपानेले जानकारी दिए । ६ जना युवाहरुलाई पोखरा महानगरका मेयर धनराज आचार्यले नगद ३० हजार रुपैयाँ, दोसल्ला र सम्मान पत्रले पुरस्कृत गरे ।
पोखरा महानगरका मेयर आचार्यले अहिले समाजमा निराशामात्रै व्यक्त भइरहेका बेला आशा जगाइरहेका युवाहरुलाई पुरस्कृत गर्दा अन्य युवाका निम्ति पनि प्रेरणादायी हुने बताए ।