‘आज दरिद्र नेपाल दुखी नेपाली भएका छन् प्रधानमन्त्रीज्यू, यस्तो परिस्थितिमा विश्वासको मत कसरी दिने ?’
जनता समाजवादी पार्टीका अध्यक्ष उपेन्द्र यादवले प्रधानमन्त्री केपी शर्मा ओलीलाई विश्वासको मत नदिने बताएका छन् । प्रतिनिधिसभा बैठकमा बोल्दै यादवले विश्वासको मत नभएर विपक्षमा मतदान गर्ने बताए । प्रधानमन्त्री केपी शर्मा ओलीले संसद असंवैधानिक तरिकाले विघटन गरेको बताउदै ओलीका कारण जनता सडकमा आउन बाध्य भएको बताए ।
सर्वोच्चले संसद पुनःस्थापित गराएपनि संसदप्रति विश्वास नभएकाले मत दिन नसकिने उनले बताए । उनले प्रधानमन्त्री ओली संघीयता विरोधी रहेको बताए । ‘प्रधानमन्त्री ओलीले संघीयता भनेको केन्द्रको इकाई मात्रै हो, बढ्ता फूर्ति नदेखाऊ भन्नुहुन्छ’ यादवले भने ।यादवले संघीय गणतन्त्रलाई नै प्रधानमन्त्री ओलीले धरापमा पार्न लागेकाले पनि समर्थन जनाउन नसकिने बताए । नागरिकता समस्या मधेशको हो भन्ने बुझाइले नै अगाडि नबढाइएको पनि यादवले आरोप लगाए ।
प्रतिनिधिसभाको सोमबारको बैठकमा बोल्दै अध्यक्ष यादवले मधेस आन्दोलनका क्रममा ओलीले दिएका अधिव्यक्ति स्मरण गराएका थिए । ओलीले विगतमा मधेसलाई युपी बिहारसँग तुलना गरेको, मधेसी आन्दोलनकारी मारिँदा आँप झरेको भनेको र मानव साङ्लोलाई माखे साङ्लो भनेको स्मरण गर्दै यादवले प्रधानमन्त्रीलाई सोधे, ‘अहिले मधेसीलाई फकाउन थाल्नुभएको छ । मधेस आन्दोलनका क्रममा आन्दोलनकारी मारिँदा दुई-चार आँप झरेका हुन् भन्नुहुन्थ्यो के अहिले त्यै आँप खुवाउएर फकाउँहुनुहुन्छ तपाईं ?’ प्रधानमन्त्रीले विगतमा ‘सुखी नेपाली समृद्ध नेपाल’ भन्ने गरेको तर अहिले त्यस्तो अवस्था नरहेको यादवको भनाइ थियो । ‘आज दरिद्र नेपाल दुखी नेपाली भएका छन् प्रधानमन्त्रीज्यू, यस्तो परिस्थितिमा विश्वासको मत कसरी दिने ?’
