नेतृत्व छनोटको लागि माओवादी केन्द्रको निर्वाचन प्रक्रिया सुरु, १ हजार ७४२ मतदाता

नयाँ नेतृत्व छनोटको लागि नेकपा माओवादी केन्द्रको निर्वाचन प्रक्रिया सुरु भएको छ । ८ औँ राष्ट्रिय महाधिवेशन अन्तर्गत शनिबारको बन्दसत्रबाट विधान मस्यौदा पारित भएसँगै माओवादी केन्द्रको निर्वाचन प्रक्रिया सुरु भएको हो ।
निर्वाचन समितिले महाधिवेशनस्थल प्रज्ञा भवनमा १ हजार ७४२ जनाको नामावली टाँसेको जनाएको छ । माओवादीको विधान अनुसार महाधिवेशन प्रतिनिधिले २९९ सदस्यीय केन्द्रीय कमिटी निर्वाचित गर्नेछ । उक्त निर्वाचित कमिटीले अध्यक्षसहित १५ सदस्यीय पदाधिकारी निर्वाचित गर्ने छ ।
यद्यपी माओवादी शीर्ष नेताहरु केन्द्रीय कमिटी सदस्यमा सहमति जुटाउन छलफलमा छन् ।
दुई घण्टा समय लिएर सहमति जुटाउने प्रयास गरिएको छ । सहमति नभएमा मतदानमा जाने अध्यक्ष पुष्पकमल दाहालले बन्दसत्रमा बताइसकेका छन् ।