पोखरामा भएको विमान दुर्घटना ज्यान गुमाएका ७२ जनामध्ये ६८ जनाको शव फेला परेको छ । आइतबार विहान काठमाडौँबाट पोखरा आएको यती एयरलाइन्सको एटिआर–७२ विमान ल्याण्ड गर्ने समयमा दुर्घटनामा परेको थियो । दुर्घटनामा चालक दलका ४ जनासहित ७२ जनाले ज्यान गुमाएका थिए ।
जिल्ला प्रहरी कार्यालय कास्कीका अनुसार हराइरहेका ४ जनाको शव खोजी जारी छ । विमान पोखरा–७ घारीपाटन र पोखरा–१५ नयाँगाउँस्थित सेती नदकिो खोचमा खसेको थियो । जसका कारण उद्दार कार्यमा समेत समस्या भएको जिल्ला प्रशासन कार्यालय कास्कीले जनाएको छ । भेटिएका सबै शव पोखरा स्वास्थ्य विज्ञान प्रतिष्ठानमा राखिएको छ । अहिले शवको पहिचानको काम भइरहेको छ ।
हालसम्म ३५ शवको पहिचान भइसकेको प्रहरीले जनायो । पहिचान भएका शवको पोष्टमार्टम गर्दै आफन्तको जिम्मामा लगाइएको प्रहरीले बताएको छ । पहिचान नभएका, विदेशी र काठमाडौंकाको शव हेलिकोप्टरमार्फत काठमाडौं पठाइने योजना रहेको प्रमुख जिल्ला अधिकारी टेकबहादुर केसीले जानकारी दिए ।
