भारतको अहमदाबादमा आयोजित प्रथम विश्व योगासन प्रतियोगिता–२०२६ मा नेपाली खेलाडी प्रिया घर्ती क्षेत्रीले उत्कृष्ट प्रदर्शन गर्दै तीन विधामा रजत पदक जित्न सफल भएकी छन् । विश्वका ७८ राष्ट्रका खेलाडीबीच भएको प्रतिस्पर्धामा प्रियाले आफ्नो असाधारण क्षमता प्रस्तुत गर्दै नेपाललाई अन्तर्राष्ट्रिय मञ्चमा गौरवान्वित बनाएकी हुन् ।
२१ जेठदेखि २६ गतेसम्म सञ्चालन भएको प्रतियोगितामा प्रियाले Rhythmic Pair, Traditional Group Challenge तथा Individual Backbend विधामा रजत पदक जितेकी हुन् । तीव्र प्रतिस्पर्धाबीच उनले व्यक्तिगततर्फ दोस्रो स्थान हाँसिल गरिन् ।
प्रतियोगितामा सहभागी राष्ट्रहरूमध्ये नेपाल समग्रमा पाँचौँ स्थानमा रहन सफल भएको थियो भने भारत पहिलो स्थानमा रहयाे । नेपालबाट ४४ जना खेलाडी तथा प्रतिनिधि सहभागी भएका थिए । उनीहरूमध्ये प्रियाको प्रदर्शन विशेष आकर्षणको केन्द्र बनेको थियो ।
प्रिया स्याङ्जाको फेदीखोला गाउँपालिका–१ मा रहेकाेअमाेर सेवा (बालगृह)काे संरक्षणमा हुर्किदै आएकी छन् । विश्व प्रतियोगितामा उल्लेखनीय सफलता हासिल गरेर स्वदेश फर्किएपछि उनलाई पोखरा अन्तर्राष्ट्रिय विमानस्थलमा भव्य स्वागत गरिएको थियो । विभिन्न संघसंस्था, शुभेच्छुक तथा स्थानीयवासीको उपस्थितिमा स्वागत गरिएकी प्रियालाई त्यसपछि सम्मानसहित फेदीखोला लगिएको थियो ।
प्रियाको सफलताप्रति खुसी व्यक्त गर्दै अमोर सेवा नेपालकी अध्यक्ष कमला पराजुलीले प्रतिभा, लगनशीलता र इच्छाशक्तिको अगाडि कुनै पनि बाधा ठूलो नहुने बताइन् । संस्था संचालन गर्नुअघि आइपरेका बाधा र सुरूवातीकाे समय सम्झदै भन्छिन, ‘असयाेग गर्नेहरूलाई छाेराछाेरीले यसरी नै पुरस्कार दिउन भन्ने लाग्छ ।’ अमाेर सेवा स्याङ्जाकाे एक मात्र बालगृह हाे ।
पराजुलीले आर्थिक तथा सामाजिक चुनौतीका बीच पनि प्रियाले हासिल गरेको सफलता सम्पूर्ण नेपालीका लागि प्रेरणादायी बनेको उल्लेख गरिन् ।
विश्वस्तरको प्रतियोगितामा तीन रजत पदक जित्दै प्रियाले केवल आफ्नो व्यक्तिगत सफलता मात्र हासिल गरेकी छैनन्, उनले नेपालको नाम अन्तर्राष्ट्रिय योगासन क्षेत्रमा थप उचाइमा पुर्याएकी छन् । उनको यो उपलब्धिलाई स्याङ्जा मात्र होइन, समग्र राष्ट्रकै गौरवका रूपमा हेरिएको छ ।
विश्वमञ्चमा नेपाली झण्डा फहराउँदै तीन रजत पदक जितेकी प्रिया घर्ती क्षेत्रीको सफलता नेपाली खेलकुद इतिहासमा प्रेरणादायी अध्यायका रूपमा स्मरणीय रहने विश्वास गरिएको बताउँछन् समाजसेवी प्रकाश श्रेष्ठ ।
