नेपाली मिश्रित मार्सल आर्ट्स (एमएमए) खेलाडी रविन्द्र ढाँट UFC मा प्रवेश गर्ने ऐतिहासिक अवसरको एक कदम मात्रै टाढा पुगेका छन्। ‘बाजाङको बाघ’का रूपमा परिचित धान्त Road to UFC सिजन–५ को ब्यान्टमवेट फाइनलमा पुगेका छन्।
अब उनले फाइनलमा जापानका र्यो ताजिमाको सामना गर्नेछन्। यो भिडन्त जिते धान्तले Road to UFC को ब्यान्टमवेट प्रतियोगिता जित्दै UFC करार पाउने अवसर प्राप्त गर्नेछन्।
ढाँटले प्रतियोगिताको पहिलो चरणमा फिलिपिन्सका किम्बर्ट अलिन्टोजोनलाई दोस्रो राउन्डमै टेक्निकल नकआउटमार्फत पराजित गरेका थिए। ग्राउन्ड गेममा प्रभावशाली प्रदर्शन गर्दै उनले उक्त जित निकालेका थिए।
सेमिफाइनलमा भने धान्तका लागि चुनौती निकै कठिन रह्यो। उनले अपराजित न्युजिल्यान्डका कासिब मर्डकसँग प्रतिस्पर्धा गरेका थिए। मर्डक ८–० को व्यावसायिक रेकर्डसहित रिङमा उत्रिएका थिए।
तीन राउन्डसम्म चलेको प्रतिस्पर्धामा धान्तले स्प्लिट डिसिजनबाट जित हात पारे। दुई निर्णायकले धान्तको पक्षमा २९–२८ को स्कोर दिए भने एक निर्णायकले मर्डकको पक्षमा २९–२८ को स्कोर गरेका थिए।
यो जितसँगै ढाँट Road to UFC को फाइनलमा पुगेका हुन्।
फाइनलमा उनका प्रतिद्वन्द्वी जापानका र्यो ताजिमा हुन्। ताजिमाले भारतका चुनग्रेङ कोरेनलाई युनानिमस डिसिजनबाट पराजित गर्दै फाइनलमा स्थान बनाएका हुन्।
ताजिमा आफ्नो दूरी कायम राख्दै सटीक र निरन्तर स्ट्राइकिङका लागि बलिया देखिएका छन्। उनको व्यावसायिक रेकर्ड ११–३ रहेको छ भने ६ जित नकआउट वा टेक्निकल नकआउटबाट आएका छन्।
धान्तले भने स्ट्राइकिङसँगै टेकडाउन, ग्राउन्ड कन्ट्रोल र ग्राउन्ड एन्ड पाउन्डमा आफ्नो क्षमता देखाइसकेका छन्। त्यसैले फाइनलमा धान्तको आक्रामक शैली र ताजिमाको दूरी कायम राख्ने स्ट्राइकिङबीचको प्रतिस्पर्धा महत्वपूर्ण हुने देखिन्छ।
धान्तको यात्रा झनै प्रेरणादायी छ। उनी यसअघि भारतको दिल्लीमा दैनिक ज्यालादारी मजदुरीसमेत गर्थे। भारतको क्षेत्रीय एमएमए प्रतियोगितामा लगातार १५ वटा भिडन्त अपराजित रहेपछि उनले आफ्नो खेल करियरलाई अघि बढाएका थिए।
उनले २०१९ र २०२० मा भारतीय राष्ट्रिय एमेच्योर एमएमए च्याम्पियनसिपसमेत जितेका थिए। पछि ONE Championship र Brave CF लगायतका प्रतियोगितामा पनि प्रतिस्पर्धा गरे।
२०२५ मा उनले भारतका चुनग्रेङ कोरेनलाई पराजित गर्दै Matrix Fight Night 17 को ब्यान्टमवेट उपाधि जितेका थिए। उक्त उपलब्धिसँगै उनी उक्त उपाधि जित्ने पहिलो नेपाली खेलाडी बनेका थिए।
अब धान्तको अगाडि एउटा मात्रै बाधा छ—र्यो ताजिमा।
ताजिमालाई हराए Road to UFC को उपाधि र UFC करारको ढोका खुल्नेछ। धान्तका लागि यो व्यक्तिगत सफलताभन्दा माथि उठेर नेपाली एमएमएका लागि ऐतिहासिक अवसर बन्नेछ।
