पोखरा महानगरपालिका–१७ राममन्दिर नजिक लेनदेन सम्बन्धी विवादका क्रममा एक महिलामाथि चक्कु प्रहार भएको छ । प्रहरीका अनुसार बुधबार अपराह्न करिब ४:११ बजे कास्कीको पोखरा–२८ माझठाना घर भई हाल पोखरा–१७ बिरौटा बस्दै आएकी ४७ वर्षीया मुना तिवारीमाथि उनका ज्वाइँ ४३ वर्षीय ध्रुवराज अधिकारीले चक्कु प्रहार गरेका हुन् । अधिकारीको स्थायी घर लमजुङको मध्यनेपाल नगरपालिका–२ रहेको बताइएको छ । चक्कु प्रहारबाट घाइते तिवारीको पेट, ढाड र छातीमा चोट लागेको छ । उनलाई उपचारका लागि पोखरा–१७ स्थित नोबेल अस्पताल पठाइएको प्रहरीले जनाएको छ । घाइतेको अवस्था मध्यम रहेको र बोल्न सक्ने अवस्थामा रहेको अस्पताल स्रोतले जनाएको छ । घटनामा चक्कु प्रहार गर्ने व्यक्तिकी श्रीमती तथा घाइतेकी छोरी २८ वर्षीया सङ्गीता तिवारीको पनि संलग्नता रहेको प्रारम्भिक अनुसन्धानबाट खुलेको प्रहरीले जनाएको छ । घटनापछि स्थानीयवासीको सहयोगमा ध्रुवराज अधिकारीलाई चक्कुसहित नियन्त्रणमा लिइएको थियो । हाल उनी वडा प्रहरी कार्यालय बैदामको नियन्त्रणमा रहेका छन् । घटनाबारे थप अनुसन्धान भइरहेको प्रहरीले जनाएको छ ।