मलेसियाले नेपाली श्रमिक भर्नाका लागि नेपालका २५ वटा म्यानपावर कम्पनीलाई मात्रै आफ्नो नयाँ विदेशी श्रमिक केन्द्रीकृत व्यवस्थापन प्रणाली (FWCMS) मा सूचीकृत गरेपछि विवाद चर्किएको छ।
मलेसियाको मानव संसाधन मन्त्रालयले २२ अगस्ट २०२६ देखि विदेशी श्रमिक भर्नासम्बन्धी नयाँ व्यवस्था लागू गर्दै स्रोत मुलुकअनुसार तोकिएका ‘Registered Recruitment Agencies’ मार्फत मात्रै श्रमिक भर्ना गर्न पाउने व्यवस्था गरेको हो। उक्त प्रणालीमा नेपालका २५ वटा म्यानपावर कम्पनी सूचीकृत भएका छन्।
नेपालमा वैदेशिक रोजगार विभागबाट इजाजत लिएका करिब १ हजार २०० म्यानपावर कम्पनी रहे पनि मलेसियाले २५ वटालाई मात्रै सूचीकृत गरेपछि वैदेशिक रोजगार व्यवसायीहरूले त्यसलाई सीमित कम्पनीलाई मात्र अवसर दिने व्यवस्था भन्दै विरोध गरेका छन्। उनीहरूले यसलाई ‘सिन्डिकेट’को सम्भावनासँग जोडेर आपत्ति जनाएका छन्।
विवादपछि नेपाल सरकार पनि उक्त व्यवस्थाप्रति असन्तुष्ट देखिएको छ। युवा, श्रम तथा रोजगार मन्त्रालयले मलेसियाको FWCMS मा सूचीकृत २५ म्यानपावरको सूचीलाई नेपाल सरकारसँगको सहमतिबिना अघि बढाइएको भन्दै आपत्ति जनाएको छ। श्रम मन्त्रालयले परराष्ट्र मन्त्रालयमार्फत मलेसिया सरकारलाई पत्राचार गर्दै यस्तो विषय द्विपक्षीय छलफल र सहमतिबाट टुंग्याउन आग्रह गरेको छ।
यसैबीच मन्त्रालयले सूचीकृत २५ म्यानपावर कम्पनीका प्रतिनिधिसँग छलफलसमेत गरेको छ। छलफलपछि २५ वटै म्यानपावर कम्पनीले FWCMS बाट आफ्नो नाम हटाउने सहमति गरेका छन्।
यसले मलेसिया रोजगारीका लागि २५ म्यानपावरलाई मात्र पहुँच दिने नयाँ व्यवस्था तत्काल कार्यान्वयनमा जाने वा नजाने विषय अनिश्चित बनेको छ। नेपाल सरकारले भने नेपाली श्रमिकको भर्ती प्रक्रिया दुई देशबीचको सहमति, संवाद र स्थापित प्रक्रियाअनुसार अघि बढाउनुपर्नेमा जोड दिएको छ।
